Selasa, 19 Mar 2024, 3:58:21

10:57:10
PASAMBAHAN MAANTAKAN MARAPULAI
Datuak.... pado datuak sambah diantakan..
Sungguahpun datuaksurang nan disambah,tagak dek adat jo pusako,dek barieh cupak jo gantang,dek alua datuak kasamonyo,ambo akan mandatangkan sambah.

Adopun sambah nan ka ditunggangkan ka bakeh datuak,kalau basiang dinan tumbuah,jikok manimbang dinan ado,tumbuah sarupo iko kini.maantakan marapulaiSandi andiko dalam kampuang,datuak tampuak jo tangkainyo,inggiran silang jo salisiah,kusuik di datuak salasainyo,karuah di datuak janiahnyo.Ibarat diri badan datuak,kayu gadang di tangah padang,baurek limbago matan,ka batang sandi andiko,badahan cupak jo gantang,barantiang barih balabeh,badaun rimbun dek adat,babungo mungkin jo patuik,babuah kato nan bana,buliah baselo diureknyo,buliah basanda dibatangnyo,gantuangan cupak nan duo,partamo cupak usali,kaduo cupak buatan.Nan dikatokan cupak usali,nan sapantiang tali bajak,kupang jo ameh masuak pulo,nan ganok duobaleh taieh,dikikih bahabih basi,dibasuah bahabih aie,dianjak indak namuah mati,dibubuik indak namuah layu,itu nan dikatokan cupak usali.Nan tasabuik cupak buatan,nan batampuang kapuah jo sadah,baliciek pinang jo gambia,sasuai mangko manjadi,saukua mangko takanak,kok datangb hujan jo paneh,batiuik angin jo ribuik,sabarih bapantang hilang,satitiak tak namuah lupo.

Lah janiah cahayo adat,lah tarang bangun pusako,bak rumpuik ditimpo rinai,musim pabilo lipuannyo.
Salangkah turun dari janjang,dari tanggo rumah kampuang etan,barih tabantang kami turuik,labuah nan golong kami tampuah,masuak ka jorong kampuang datuak.

Kok tibo alah baduduakkan,lah taunjuak siriah di carano,tando lah sudah makan jo minum,Nan sakarang iko kini,pihak pado diri marapulai,lah duduak diateh rumah,duduak diruang rumah nan gadang,dilingkuangan ninik sarato mamak,dihadapan ibu jo bapak,sarato ipa dengan bisan,cukuik jo urang mudo matah,lah duduak basandiang duo,nan bak bulan jo matohari,bintang kujarah manguliliang.

Kok tumbuah ditangah rumah,kajadi adat bijo nan baiek,kataungkek pamanih jalan,kakarih pamaga diri,dalam adat baradat pulo,kok elok ratak tangannyo,panjang baok ka mangarek,singkok baok ka muleh,senteang baok ka mambilai.Kok elok ratak lidahnyo,kusuik baok manyalasai,kusuik baok mampajaniah,kok kahilia samo kahilia,kok kamudiak samo kamudiak.

Tapi samantangpun baitu,pihak pado marapulai,raso manitiak niro pinang,antah baraie antah tido,nan ba alu patah talimpo,musim pabilo kan bataruak,ibo nan bak padi salibu,awak tumbuah musim talampau,urek tagantuang ka jurami,rangkiang tinggi nan dicinto,supayo datuak tarimo elok-elok,iyo didalam tapak tangan,sakian sambah pado datuak...

Jaweknyo
Lah sampai angku datuak...
Iyo dek kami sipangkalan,alek jamu dalam pangkalan,sambah taunjuak kanan rapek,titah tatabua kanan banyak,kapado datuak kasadonyo,sarato alek nan datang,nan dilingkuang dindiang ditapi,nan saedaran bandua ditangah.

Tantangan rundiang nan ka tangah,datuak lah babondong datang kamari,turun dari tanggo kampuang etan,arak iriang lah sapanjang jalan,aguang jo calempong jadi tapuang,sorak jo sorai jadi bungo,salatuie badie pusako,tagak marawa bungo adat,baguguah tabuah larangan,larangan datuak nan basamo,masuak lorong kampuang datuak,duduak lah lamo taselo,diateh rumah tango iko.
Pado katiko iko kini,lah ampek adat nan tapakai,partamo sambah manyambah,kaduo baso jo basi,katigo sirieh jo pinang,ka ampek minium jo makan.

Nan sakato sambah manyambah,ganti mulie bamuliekan,tandonyo hiduik banangari,tandonyo kampuang bahalaman,rukun damai dalam nagari,takato baso jo basi,diliek ereng dengan gendeang,mamakai paham rabah tagak,runciang kok lai ka mancucuak,tajam kok lai kamaluko.Nan dek tuo siriah jo pinang,adat usang pusako lamo,didalam luak nan tigo,balanjuang gantang balambak,panungkek tinggi baanjuang.

Nan dikato minum jo makan,mulie alek dek minum makan,ubek jariah pamaga lapa,aka dapek pikiran tumbuah.Nan sakarang iko kini,cancang nan duo sagaragai,adat nan duo sakaitan,aso adat ka duo sarak,niat sampai kaua lah salamt,adat jo sarak lah salasai,adat lah tabatu intan sarak lah taujudullah,kateh lah taambun jantan,kabawah lah takasiak bulan,pado katiko iko kini,tipak kadiri marapulai,nan batarimo baiek baiek,ditarimo jo suko hati,kan baitu bana kato datuak...

Indak lai datuak....nan sapanjang kato datuak nangko iyolah nan sabananyo,hanyo baato hanyo lai,kok tumbuah ditangah rumah,ka jadi peti bunian,hibo bak padi salibu,dicupak kurang saketek,ditareh tidaknyo ganok,hanyo baato hanyo lai,tahadok kadiri marapulai,alah tasangkuik kanan tinggi,alah tasanda kanan gadang,kami tarimo baiek baiek...sakian jawaek dari kami.

sumber:
H.Idrus Hakimy Dt.Rj.Panghulu:
Pegangan penghulu,bundo kanduang dan pidato alua pasambahan adat minangkabau

Category: Minangkabau | Views: 16024 | Added by: dash | Rating: 0.0/0
Total comments: 0
dth="100%" cellspacing="1" cellpadding="2" class="commTable">
Nama *: Email:
Code *: